Gender tenglikni ta’minlash va munosib mehnat sharoitlarini yaratish

Joriy yilning 2-avgust kuni Qishloq xo‘jaligi texnikasi va texnologiyalarini sertifikatlash va sinash markazida O‘zbekiston Agrosanoat majmui xodimlari kasaba uyushmasi Respublika kengashi bilan hamkorlikda gender tenglik mavzusiga oid o‘quv seminari tashkil etildi.

Seminarda Qishloq xo‘jaligi vazirligi Xotin-qizlar va erkaklar uchun teng huquq hamda imkoniyatlarni ta’minlash bo‘yicha Maslahat kengashi raisi D. Imomova, O‘zbekiston Agrosanoat majmui xodimlari kasaba uyushmasi Respublika kengashining Mehnatkashlarning ijtimoiy-iqtisodiy manfaatlarini himoya qilish bo‘lim mudiri Sh.Begimqulovalar o’z ma’ruzalari bilan ishtirok etdi.

Muloqot davomida O‘zbekistonda gender tenglikni taʼminlash, xotin-qizlarning huquq hamda imkoniyatlarini kengaytirish, ularning bandligiga ko‘maklashish borasida amalga oshirilayotgan islohotlar to‘g‘risida fikr almashildi.

Qolaversa, so‘nggi olti yilda gender tenglikni taʼminlashga, xotin-qizlarning huquq hamda imkoniyatlarini kengaytirishga, ularni tazyiq va zo‘ravonlikdan himoya qilishga, oila institutini mustahkamlashga qaratilgan 40 dan ziyod qonun hujjatlarining qabul qilingani, shu jumladan, 2030 yilga qadar  O‘zbekistonda gender tenglikni taʼminlash strategiyasining ahamiyati, ularni amalga oshirish bo‘yicha Milliy dastur va chora-tadbirlar rejasi ishlab chiqilganligi, shu yoʻnalishda  olib borilayotgan islohotlar qator xalqaro reyting agentliklari tomonidan ham yuqori baholanayotganligi qayd etildi.

Shuningdek “Open Data Watch” tashkilotining Ochiq gender maʼlumotlari indeksida O‘zbekiston 69,7 ball bilan 195 ta davlat orasida 18-o‘rinni qayd etib, top-20 talikdan joy olganligi alohida taʼkidlandi.

Seminar so‘nggida gender tenglikka erishish bo‘yicha yangi yondashuvlar, g‘oyalar va tashabbuslar yuzasidan taklif va tavsiyalar berildi.