Ish samaradorligi yuqori bo‘lgan qishloq xo‘jaligi texnikalari namoyish etildi
Bugun agrar sohada so‘nggi yillarda erishilgan ilm-fan yutuqlari va innovatsiyalarsiz ko‘zlangan maqsadlarga erishib bo‘lmasligini hayotning o‘zi ko‘rsatib turibdi. Zero, dunyoda kuzatilayotgan iqlim o‘zgarishining salbiy omillari, suv yetishmasligi, yerlarning kuchli degradatsiyasi agrar sohada yillar davomida to‘plangan tajribalar bilan uzoqqa borib bo‘lmasligini isbotlab bermoqda.
Shu bois Qishloq xo‘jaligi vazirligi va tizim tashkilotlari tomonidan qishloq xo‘jaligiga ilm-fan yangiliklari va innovatsion ishlanmalarni jalb qilish, qurg‘oqchilikka va sho‘rga chidamli ekin navlarini o‘zlashtirish, kam sarf-xarajat talab qiladigan, energiya tejamkor texnikalar va agregatlardan foydalanishni yo‘lga qo‘yish borasida izchil ishlar amalga oshirilmoqda.
Vazirlik tizimidagi Qishloq xo‘jaligi texnikasi va texnologiyalarini sertifikatlash va sinash markazining Toshkent viloyati Yangiyo‘l tumanida joylashgan sinov tajriba maydonida ko‘rgazmali seminarda ham ana shunday ish samaradorligi yuqori bo‘lgan texnikalar namoyish etildi.
Unda “Chirchiqselmash” MChJ, “Rust-alp-texmash” MChJ va “TTZ” OAJ xodimlari hamda Qishloq xo‘jaligi texnikasi va texnologiyalarini sertifikatlash va sinash markazi mutaxassislari shuningdek, Toshkent viloyatidagi agroklasterlar va fermer xo‘jaliklari vakillari ishtirok etdi.
Ko‘rgazmali seminarda paxta qator oralariga va tekis maydonga bug‘doyni aniq o‘lchamlarda ekadigan smart pnevmatik bug‘doy ekish seyalkasi, yangi turdagi kombinatsiyalashgan PVP-30 ventilyatorli purkagich, 3 g‘ildirakli TTZ DF 903H rusumli chopiq traktori hamda raqamlashtirilgan va GPS qurilmasi o‘rnatilgan LOVOL rusumli traktor, shuningdek, paxta qator oralariga ishlov beradigan orqa osma kultivator va boshqa texnikalarning dala sharoitida ishlash jarayonlari namoyish etildi.
Tadbir ishtirokchilariga mazkur texnikalarning ochiq dalada va g‘o‘za qator oralarida ishlash tartibi, ularning ish unumdorligini oshirishdagi o‘ziga xos xususiyatlari hamda agrotexnik tadbirlarni amalga oshirishda bu texnikalarning o‘rni haqida yetarlicha ma’lumotlar berildi.