Traktorlarni sinash sohasida hamkorlik
2024 yilning 7-13 iyul kunlari O‘zbekiston Respublikasi Qishloq xo‘jaligi vazirligi huzuridagi Qishloq xo‘jaligi texnikasi va texnologiyalarini sertifikatlash va sinash markazi direktorining birinchi o‘rinbosari A.Tolibayev boshchiligidagi guruh mutaxassislari Belarus Respublikasi Qishloq xo‘jaligi va oziq-ovqat vazirligining “Belarus mashina sinash stansiyasi” davlat muassasasi mutaxassislari bilan tajriba almashish, mutaxassislar malakasini oshirish, ilg‘or sinov jarayonlarini birgalikda o‘rganish, taqqoslash sinovlarini olib borish hamda xalqaro standartlar talablari asosida sertifikatlashtirish sinovlarini o‘tkazish va sinov natijalarini o‘zaro tan olish maqsadida xizmat safarida bo‘ldi.
Xizmat safariga taqqoslash sinovlarini o‘tkazishni tashkil qilish uchun 20 dan ortiq o‘lchash va sinash vositalari olib borildi. TUMOSAN 8110, BELARUS-922.3 rusumli traktorlar misolida birgalikda 15 dan ortiq ko‘rsatkichlar: traktorlar va o‘zi yurar texnikalarning tashqi shovqini, tormoz tizimining samaradorligi, ag‘darilish burchagi, kabinadagi shovqin darajasi, chang miqdori, boshqaruv organlarining joylashuvi, o‘rindiqdagi va boshqaruv organlaridagi tebranishlar o‘lchami, xavo harorati, namligi, shamol tezligi, zararli moddalarning miqdori, kirish yo‘lining o‘lcham tasniflari, qishloq xo‘jaligi texnikalarini gabarit o‘lchamlari, boshqaruv panelidagi yorug‘lik darajasi, yo‘l tirqishi, kabinaga kirish qismi o‘lchamlarini aniqlash bo‘yicha taqqoslash sinovlari o‘tkazildi.
QTTSM mutaxassislari tomonidan taqqoslash sinovlarini o‘tkazish davomida o‘lchashlarning aniqligini oshirish maqsadida o‘lchash va sinash vositalaridan to‘g‘ri ishlatish, zarur asbob-uskunalarning texnik tasniflariga qat’iy rioya qilish, zamonaviy usullardan foydalanish maqsadga muvofiqligi qayd etildi.
Taqqoslash sinovlaridan olingan natijalarni zamonaviy usullardan foydalanib tahlil qilish, qayta ishlash hamda ular asosida bayonnoma rasmiylashtirishda QTTSM mutaxassislari o‘zlarining takliflarini bildirdi. Birgalikda olib borilgan taqqoslash sinovlari natijalarida ijobiy ko‘rsatkichlar qayd etildi.
Safar davomida QTTSM mutaxassislari Minsk traktor zavodi OAJning “MTZ-Xolding” traktorlarni sinash markaziga ham tashrif buyurishdi.
Tashrifdan ko‘zlangan asosiy maqsad – respublikamizda keng qo‘llanilib kelinayotgan Belarus traktorlariga 3-sxema bo‘yicha sertifikatlashtirish ishlarini tashkillashtirish. Bunda Belarus traktorlarini yetkazib beruvchi tadbirkor, klaster va fermer xo‘jaliklariga muvofiqlik sertifikatlarini rasmiylashtirishda ancha qulayliklar beradi.
Minsk traktor zavodi 1946 yilda tashkil qilingan bo‘lib, Belarus Respublikasi bo‘yicha 14 ta ishlab chiqarish korxonalari mavjud. Belarus traktorlari 125 ta davlatga eksport qilinadi. Respublikamizda ham Belarus traktorlarining 5 dan ortiq rusumlari foydalaniladi.
“MTZ-Xolding” traktorlarni sinash markazida MTZ OAJ tomonidan ishlab chiqariladigan traktorlar, uzel va komponentlarning stendlarda sinash jarayonlari ko‘zdan kechirildi.
Tashrif davomida QTTSM va “MTZ-Xolding” traktorlarni sinash markazi mutaxassislari bilan birgalikda BЕLARUS 826 rusumli traktorining tashqi shovqinini, boshqaruv organlarining joylashuvini, o‘rindiqdagi va boshqaruv organlaridagi tebranishlar o‘lchamini aniqlash bo‘yicha taqqoslash va ko‘rgazmali sinovlar o‘tkazildi hamda olingan natijalar bo‘yicha bayonnoma rasmiylashtirildi. Birgalikda olib borilgan sinovda ijobiy ko‘rsatkichlar qayd etildi.
Kelgusida “MTZ-Xolding” traktorlarni sinash markazi rahbariyati bilan boshqa ko‘rsatkichlarni ham birgalikda aniqlash, sinovlarni o‘tkazish va zarur me’yoriy hujjatlarni ishlab chiqish bo‘yicha kelishib olindi.
